L’Idepa espón el potencial d’Asturies como llugar d’inversión nel principal eventu sobre emprendimientu del sur d’Europa

El Principáu, al traviés del Grupu Idepa, espón el potencial d’Asturies como llugar d’inversión nel principal eventu sobre emprendimientu del sur d’Europa, el South Summit 2021, que se celebra dende güei y hasta’l xueves en Madrid. Nesi marcu presentóse la iniciativa Start in Asturias, un programa de sofitu a empreses emerxentes (startups) que quieran instalase na comunidá.

El South Summit ye una cita clave a nivel internacional pa poner en contactu a entamadores y compañíes innovadores. Como n’anteriores ediciones, va axuntar a les 100 meyores startups del ecosistema nacional y mundial, escoyíes ente más de 3.800 proyectos presentaos. Les empreses participantes vienen de 124 países.

El Grupu Idepa, al traviés del Centru Européu d’Empreses y Innovación (CEEI) y Asturex, coordinó la participación de la delegación asturiana, que tien estand propiu nesti eventu y ta formada por nueve empreses emerxentes: Aireas, Bettermaps, Guppy, H2Vector, Mindcoa, Nanoker Research, Onirix, Team EQ y Triditive.

L’asistencia al South Summit 2021 busca dos oxetivos principales. Per un llau, asitia Asturies como ecosistema de referencia pa compañíes emerxentes y divulgar oportunidaes y instrumentos que contribuyen a l’atracción, creación y espansión de firmes tecnolóxiques baxo la iniciativa Start in Asturias, col Fondu Asturias Startup como exa central. Por otru, favorecer la participación d’empreses rexonales pa que puedan establecer oportunidaes nueves de negociu y llograr financiamientu.

La directora del Idepa, Eva Pando, punxo en valor el potencial entamador d’Asturies y el sofitu coordináu qu’empresten toles entidaes venceyaes a la entidá: el CEEI, Asturex, la Sociedá Rexonal de Promoción (SRP) y la Sociedá de Garantía Recíproca (Asturgar).

​​​​​​​

Fondo Asturias Startup

Mientres la so intervención nel South Summit, Pando informó sobre’l llanzamientu de la segunda convocatoria del Fondu Asturias Startup, una ferramienta de sofitu financieru impulsada pol Gobiernu d’Asturies, al traviés de la SRP, y dotada con 4,5 millones. Esta convocatoria va tar abierta del 5 d’ochobre al 5 de payares.

Esti fondu ofrez financiación pa empreses emerxentes que quieran establecese o que yá operen n’Asturies en dos modalidaes:

• La fase I: pa startups en desenvolvimientu y validación de modelu de negociu, productu o serviciu mínimu viable, que pueden optar a préstamos participativos de 50.000 a 100.000 euros.
• La fase II: dirixida a empreses en crecimientu que demostraren tracción de mercáu, que puen optar a préstamos participativos de 100.000 a 200.000 euros.

Amás, los promotores van cuntar col asesoramientu del CEEI pal diseñu del plan de negociu.

Na primer convocatoria del fondu presentáronse 28 proyectos (20 en fase I y 8 en fase II). Finalmente, validáronse 6 proyectos (5 en fase I y 1 en fase II), colos que se punxo en marcha’l procesu d’estudiu de financiamientu por parte de la SRP. El restu siguen en procesu de mentoría por parte del CEEI.

Fonte: Nota de prensa Gobiernu d’Asturies