L’HUCA, ún de los primeros centros sanitarios del país n’implantar la ciruxía xinecolóxica de puertu únicu vaxinal

L’Hospital Universitariu Central d’Asturies (HUCA) ye ún de los primeros centros del país n’implantar la ciruxía vaxinal de puertu únicu, una intervención mínimamente invasiva que nun precisa incisiones pa llegar a la cavidá abdominal de les pacientes.

Esta técnica denominada vNOTES (Natural orifice transluminal endoscopic surgery) ameyora la recuperación de les muyeres que se someten a una intervención xinecolóxica, al menguar el dolor postoperatoriu amás de posibles complicaciones vinculaes a la ciruxía abdominal convencional. Trátase d’una alternativa quirúrxica segura, qu’amenorga la necesidá de cuidaos y la estancia hospitalaria.

La intervención consiste n’acceder a la cavidá abdominal al traviés de la natura. Pa eso, asítiase un dispositivu especial que dexa a los especialistes introducir l’instrumental necesariu, ensin falta d’usar trocares, lo qu’evita que queden repuelgos nel vientre de les pacientes. La técnica pue usase nes más de les patoloxíes xinecolóxiques benignes y en delles malignes, y ta indicada sobre manera en muyeres con riesgu de complicaciones na ciruxía convencional, como les que presenten sobrepesu.

El Serviciu de Xinecoloxía y Obstetricia del HUCA realizó pela primer vez esta intervención novedosa a mediaos d’ochobre a una paciente con una lesión premaligna uterina y con comorbilidá asociada que quitaba de facer una intervención convencional. Les xinecólogues Beatriz Duplá y Soledad Fidalgo practicaron una histerectomía total con doble anexectomía, quier dicise, estirparon l’úteru y los ovarios de la muyer con esta técnica novedosa.

La técnica usóse la primer vez n’animales nel 2004 y ocho años depués, n’humanos.