La llista d’espera quirúrxica baxa per tercer mes consecutivu

• El Sespa valora prorrogar la vixencia del plan de choque otros seis meses énte l’impactu de la covid na actividá programada de los centros sanitarios.
• Los especialistes hospitalarios realizaron 115.832 consultes n’avientu, más que nel mesmu períodu d’años anteriores a la pandemia.

La llista d’espera quirúrxica estructural menguó per tercer mes consecutivu hasta contabilizar al final d’avientu 20.115 persones pendientes d’una intervención. Esti descensu manifiéstase nes más de les especialidaes, concretamente en 10 de 15.

Les cifres d’avientu son inferiores a les d’agostu (20.371). N’años anteriores a la pandemia, dambos meses solíen rexistrar aumentos nes llistes d’espera pol descensu de l’actividá. Sicasí, nel 2021 la medría contúvose nun escenariu d’alta incidencia del coronavirus.

Otra manera, la demoranza media estructural caltiénse estable al respective de payares, en 95 díes, a pesar del impactu de la covid na asistencia hospitalaria. En delles especialidaes llogróse inclusive amenorgar tiempos: n’Anxioloxía y Ciruxía Vascular rebaxáronse en cuasi 7 díes; en Ciruxía Cardiaca, Ciruxía Torácica y Neurociruxía, en 5, y en Maxilofacial, en 4.

Salú tamién consiguió baxar un 7 % al respective de payares el númberu de pacientes con más de 180 díes d’espera, lo que supón 227 persones menos.

La vacunación frente a la covid, l’actividá estraordinaria peles tardes en consultes y pruebes diagnóstiques, la optimización de l’actividá ordinaria y el plan de choque contribuyeron a menguar les llistes d’espera, nes que s’observa un ameyoramientu nel últimu trimestre del 2021.

Balance del plan de choque

El Sespa valora prorrogar otros seis meses la vixencia del plan de choque, una midida que se caltuvo activa pese al impactu grande de la covid na actividá hospitalaria programada, qu’algamó un nivel d’alerta de 3 sobroe 4.

El mes pasáu realizáronse 311 intervenciones quirúrxiques en xornada de tarde con gran implicación de los profesionales de los hospitales. Amás, desque empezó’l plan, el 20 de setiembre, hasta’l 31 d’avientu, lleváronse a cabu 1.605 ciruxíes vespertines.

Al respective de les consultes, los especialistes atendieron n’avientu un total de 115.832, un númberu superior al que s’algamó nel mesmu mes n’años previos a la pandemia. Amás, efectuaron 27.005 pruebes de diagnósticu, frente a les 22.458 practicaes nel 2019. Tamién consiguieron amenorgar en 4 díes la demoranza pa escáneres.