Industria publica nel BOPA toles ayudes pa impulsar la dixitalización del comerciu de proximidá, dotaes con 1,6 millones anguaño

• El boletín oficial tamién recueye les trés llinies de subvenciones pal sector artesanu, que sumen 175.000 euros

La Conseyería d’Industria, Empléu y Promoción Económica destina anguaño 1.655.000 euros a impulsar la tresformación dixital del comerciu minorista. Esos fondos, enmarcaos nel Programa Integral de Dixitalización del Comerciu d’Asturies (DICA), articúlense al traviés de cinco llinies d’ayudes al sector que ayeri publicaba’l Boletín Oficial del Principáu d’Asturies (BOPA). El plazu de solicitú de les ayudes empieza güei.

Estes cinco llinies son:

• 800.000 euros a la Fundación CTIC, la entidá collaboradora na execución del programa DICA.
• 355.000 euros p’ayudes a la modernización del pequeñu y medianu comerciu pa facilitar la so adaptación a les tendencies de formatu, diseñu y xestión actuales, de cara a acelerar la so adaptación dixital.
• 264.000 euros pa sofitar a les asociaciones sectoriales, impulsar la dinamización del comerciu de proximidá y sensibilizar a los profesionales sobre la tresformación tecnolóxica.
• 236.000 euros en subvenciones a asociaciones y agrupaciones de comerciantes y mistes de comerciu y turismu pal desenvolvimientu de planes estratéxicos. En dambos casos, el sofitu diríxese a acciones de les organizaciones sectoriales y a los conceyos pal fomentu del turismu de compres y la modernización de los establecimientos.
• 80.000 euros pal sofitu y promoción del comerciu rural, cola mira d’ameyorar la so posición frente a los formatos nuevos de venta.

Estes llinies d’ayudes formen parte del Programa de Dixitalización Integral del Comerciu d’Asturies 2021-2023, una iniciativa pionera impulsada l’añu pasáu pol Principáu pa impulsar la tresformación tecnolóxica del comerciu minorista y ameyorar la so competitividá frente a los nuevos modelos de venta y demandes de los consumidores. La Conseyería d’Industria, Empléu y Promoción Económica impulsa esti plan, que cunta con un presupuestu de 5,1 millones pa trés años, nel marcu del diálogu social, y cunta cola collaboración de la Fundación CTIC como sociu tecnolóxicu.

Nel so primer añu d’actividá, el DICA auditó la madurez dixital de 1.007 establecimientos, la metá de los cualos yá tán n’itinerarios personalizaos pa incorporar ferramientes dixitales. A lo llargo d’esti exerciciu prevése evaluar a otros 1.600 comercios y acompañar a 600 más.

Ayudes al sector de l’artesanía

Otra manera, el BOPA tamién publicaba ayeri les trés llinies d’ayudes autonómiques destinaes a sofitar al sector de l’artesanía, por importe de 175.000 euros:

• 100.000 euros pa la organización de feries y cursos de formación, coles mires d’ameyorar la comercialización de les producciones y implicar al sector na celebración d’eventos sectoriales.
• 40.000 euros pa inversiones en talleres, col propósitu de sofitar la renovación d’equipos y ameyorar los procesos productivos.
• 35.000 euros pa l’asistencia de profesionales a feries y cursos fuera d’Asturies, col fin de sofitar l’actualización de conocencies ente los profesionales, l’accesu a mercaos nuevos y la meyora de la imaxe esterior de l’artesanía rexonal.

Asturies cunta con un censu de 84 oficios artesanos y 227 profesionales activos, según los datos del Rexistru d’Artesanos. Una docena d’actividaes concentren el mayor númberu de profesionales: xoyería, ceramistes, muralistes, esmaltistes y modeladores; marroquinería, carpintería, azabachería, tallistes de madera, modistes y xastres; ebanistería, cuchillería y navayería, bixutería, platería y decoración del cueru.

Amás d’estes tres llinies d’ayudes, la Conseyería d’Industria destina otros 30.000 euros nuna subvención nominativa al Conceyu d’Uviéu pa la celebración de la feria d’artesanía de Navidá, la más importante d’Asturies, qu’axunta a unos 60 profesionales, y 2.500 euros pal concursu Pieza Única. Tamién entama los Díes Europeos de l’Artesanía y xestiona la web www.artesaniadeasturias.com, onde se promociona a tolos profesionales qu’asina lo quieran.