- La llista d’espera quirúrxica de más de 180 días mengua en febreru a pesar de la ocupación hospitalaria tan alta pola covid y los ingresos y ciruxíes urxentes por otres patoloxíes
- El Serviciu de Salú reduz la demoranza media en consultes esternes, pruebes y operaciones
El Serviciu de Salú del Principáu (Sespa) aumentó un 20 % l’actividá de primeres consultes en febreru y un 56 % el númberu de pruebes diagnóstiques, a pesar de concatenar trés meses siguíos con una presión asistencial alta.
En concreto, les primeres consultes con especialistes hospitalarios aumenten el tercer mes siguíu. En total, rexistráronse 149.382, cuasi un 20 % más qu’en xineru (124.206). Amás, la demoranza media vuelve baxar, hasta los 74 díes, 9 menos qu’en xineru y una cifra qu’iguala les rexistraes xusto primero de la pandemia. N’Oftalmoloxía y Ciruxía Vascular, los tiempos baxaron en 26 y 15 díes, respectivamente.
Tocante a les pruebes diagnóstiques, realizáronse 34.152, lo qu’implica 12.342 más qu’en xineru (21.807), polo que se recupera l’actividá d’años anteriores a la crisis sanitaria. Tamién medra’l númberu de mamografíes (6.349), ecografíes (10.380) y escáneres (10.738) y amenorguen les demorances medies nestes pruebes.
Los hospitales públicos asturianos atendieron una ocupación alta de cames en planta y unidaes de críticos por pacientes y aislamientos de la covid, que coincidió con una demanda grande d’hospitalizaciones por otres patoloxíes y intervenciones quirúrxiques urxentes. Esta situación afecta a la programación de pacientes en llista d’espera por una operación, que zarra febreru con 21.242 ciruxíes pendientes. A pesar d’estes circunstancies, llogróse menguar en 4 díes el tiempu mediu d’espera al respective de xineru, al asitiase la demoranza en 95 díes.
Amás, el Sespa intensificó la programación de les intervenciones con esperes superiores a 180 díes, de manera qu’al zarrase’l mes pasáu atópense nesta situación 336 pacientes menos que nel primer mes del añu.
Otra manera, la demoranza media pa pasar per quirófanu baxó en 10 de les 15 especialidaes quirúrxiques, ente les que figuren Oftalmoloxía, Otorrinolaringoloxía y Uroloxía. En Dermatoloxía y nes ciruxíes vascular y torácica baxó’l númberu de pacientes en llista d’espera estructural.
El Principáu foi quién a caltener en febreru una actividá quirúrxica ordinaria asemeyada a la d’años prepandémicos. En total, lleváronse a cabu 4.683 intervenciones programaes, una cifra bien paecida a la del mesmu mes del 2020, cuando s’efectuaron 4.984. Trátase d’un númberu bien superior a les operaciones programaes en xineru y avientu, cuando se realizaron 3.761 y 3.580, respectivamente.
Plan de choque con intervenciones peles tardes
A pesar de la presión asistencial tan alta pola covid y l’atención de patoloxíes urxentes non demorables, el Sespa caltuvo activu’l plan de choque énte les llistes d’espera, con intervenciones quirúrxiques en xornaes de tarde. Asina, en febreru, contabilizáronse 447, lo que supón 108 más que’l mes anterior.
Dende’l principiu del plan, realizáronse 2.391 ciruxíes vespertines. Nesti sentíu, el Sespa cunta aumentar el ritmu d’actividá de los quirófanos si se caltienen los indicadores asistenciales relativos al coronavirus de les últimes selmanes.