El Principáu refuerza esta seronda la promoción turística pa desestacionalizar la demanda

El Gobiernu d’Asturies refuerza esta seronda la promoción turística pa desestacionalizar la demanda. En concreto, va invertir 600.000 euros cola mira de dar a conocer la comunidá nos principales destinos nacionales que tienen conexón directa col Principáu: Madrid, Barcelona, Sevilla, Málaga, Las Palmas, Tenerife, Alicante y Mallorca.

Les acciones publicitaries van desenvolvese a lo llargo del tercer trimestre, sobre manera en formatos d’esterior. Los soportes promocionales cunten con gráfiques y mensaxes específicos pa cada mercáu que busquen aumentar les visites a Asturies na seronda.

Col mesmu oxetivu, la Viceconseyería de Turismu va llanzar nes selmanes vinientes una campaña de refuerzu en mercaos de proximidá, enfocada a escapaes urbanes. Esta acción cunta con un presupuestu de 114.000 euros y va centrase en Galicia, Cantabria, País Vascu y Castiella y Llión.

Dambes iniciatives súmense a les acciones publicitaries en soportes y medios de comunicación empobinaes al mercáu nacional, qu’a últimos d’añu van algamar una inversión global 2.165.000 euros.

Otra manera, el Principáu va reconocer la trayectoria de más de 30 profesionales de la restauración nun actu que se va celebrar nel Centru Niemeyer el xueves que vien, día 14, a les 11:00 hores, pola mor del Día de la Hostelería. Nesti eventu, esos profesionales van nomase embaxadores de la cocina de paisaxe. La iniciativa surde cola vocación de reforzar Asturies como territoriu gastronómicu.

Fonte: Nota de Prensa Gobiernu d’Asturies