- La Conseyería de Derechos Sociales soscribe un conveniu col Gobiernu central p’amenorgar la fienda tecnolóxica de les persones que reciben el salariu social y l’ingresu mínimu vital.
- “Trátase del proyectu autonómicu más ambiciosu que se llevó alantre hasta la fecha en materia d’incorporación social”, asegura Melania Álvarez.
El Gobiernu d’Asturies va poner en marcha a principios d’anguaño un proyectu pioneru n’inclusión dixital pa perceptores de rentes mínimes que va cuntar con un financiamientu de 7,3 millones de fondos europeos.
La Conseyería de Derechos Sociales y Bienestar y el Ministeriu d’Inclusión, Seguridá Social y Migraciones soscribieron un conveniu pa la execución del programa pilotu Conect-AS: itinerarios d’inclusión social dixital nel Principáu d’Asturies, enmarcáu nel marcu del Plan de Recuperación, Tresformamientu y Resiliencia, y diseñáu p’amenorgar la fienda dixital que sufren les persones en riesgu de probeza que perciben rentes como l’ingresu mínimu vital o’l salariu social básicu.
El proyectu, que prevé llegar a 3.000 beneficiarios, plantega cuatro llinies d’actuación esenciales:
- Itinerariu formativu adaptáu y individualizáu pa facilitar l’adquisición d’habilidaes básiques pa la inclusión dixital.
- Bono Conect-AS pa la inclusión social dixital. La concesión d’ayudes a les persones participantes pa l’adquisición d’un equipu portátil y/o conexón a internet mientres un añu considérase un componente clave de la iniciativa.
- Desarrollu d’una rede d’apoyu en centros de dinamización tecnolóxica local y equipamientos asemeyaos. Pa ello, la Conseyería de Derechos Sociales y Bienestar recabó l’apoyu de tolos conceyos asturianos.
- Meyora de l’accesibilidá a les principales prestaciones sociales (estatales, autonómiques y locales) al traviés de medios telemáticos.
La selección de los participantes va llevase alantre na primer metá del añu y los itinerarios formativos van empezar en setiembre en tolos conceyos. Esti proyectu llevóse a cabu como esperiencia pilotu en Parres y agora amplíase a tol territoriu.
“Trátase del proyectu autonómicu más ambiciosu lleváu a cabu hasta la fecha en materia d’incorporación social”, destacó la conseyera de Derechos Sociales y Bienestar, Melania Álvarez, quien valora tamién el calter “eminentemente prácticu” d’esta midida, que “pretende facilitar a les persones en riesgu d’esclusión social l’accesu a los sos derechos al traviés de medios telemáticos”.
“Mientres l’estáu d’alarma quedaron bien a les clares les dificultaes de la población pa realizar trámites electrónicos, non yá pola falta d’equipos, sinón tamién pola ausencia d’habilidaes”, añedió.