El Principáu impulsa un marcu de gobernanza conxunta con tolos conceyos al traviés de l’Axenda Urbana y Rural d’Asturies

• La redacción del AURA arrinca colos trés conceyos que yá tán trabayando nesta materia: Ayer, Castropol y Xixón
• El proyectu plantega una visión estratéxica a mediu y llargu plazu que va permitir optimizar recursos a partir de les comarques funcionales

El Gobiernu del Principáu empecipió la redacción de l’Axenda Urbana y Rural d’Asturies (AURA) colos conceyos que yá tán trabayando nesta materia: Ayer, Castropol y Xixón. El conseyeru de Mediu Rural y Cohesión Territorial, Alejandro Calvo, treslladó güei a l’alcaldesa de Xixón, Ana González, y los rexidores d’Ayer, Juan Carlos Iglesias, y Castropol, Francisco Javier Vinjoy, les meyores recoyíes nel protocolu alcordáu col Ministeriu de Tresportes, Movilidá y Axenda Urbana pa la redacción ya impulsu d’esti proyectu. A la xunta asistió tamién la presidenta de la Federación Asturiana de Conceyos (FACC), Cecilia Pérez, pa promover el desenvolvimientu d’esta iniciativa nel restu de conceyos.

Esti marcu plantega una visión estratéxica a mediu y llargu plazu que va permitir optimizar recursos por aciu la creación de sinerxes ente les distintes comarques funcionales p’ameyorar la productividá de les distintes polítiques del gobiernu, englobando de forma conxunta lo rural y lo urbano. L’axenda va facilitar, amás, la collaboración ente l’Alministración autonómica y los conceyos.

La heteroxeneidá y diversidá de condiciones de los trés conceyos pueden constituyir un modelu de bones práctiques que sirva de referencia al restu de conceyos. L’oxetivu pasa por afalar proyectos pilotu que visibilicen la planificación y gobernanza conxunta del territoriu.

L’Axenda Urbana de la Unión Europea pretende ser un conxuntu coherente d’acciones destinaes a desenvolver el plenu potencial de les zones urbanes y aumentar la so aportación p’algamar los oxetivos comunes a escala nacional y europea. Nel casu del Principáu, l’axenda va dexar concretar la definición, alredor a les distintes comarques funcionales, d’una zona nueva que va recoyer el calter metropolitanu d’Asturies. Tamién van xugar un papel fundamental les villes y cabeceres de comarca, que contribúin a afitar población y catalizar la economía tanto nel mediu urbanu como nel rural.

Al traviés d’esti nuevu marcu, la Conseyería de Mediu Rural y Cohesión Territorial va realizar un trabayu específicu pal desenvolvimientu del área central y del restu de comarques funcionales, en collaboración cola FACC y coles mires de establecer una gobernanza compartida qu’ameyore la calidá de vida de la ciudadanía