El Principáu contempla anguaño una inversión histórica en dependencia de 278 millones

• El Gobiernu d’España incrementó la so aportación añal en cuasi 17 millones, gracies al plan de choque impulsáu pola Conseyería de Derechos Sociales y Bienestar
• L’Executivu autonómicu atiende anguaño a unes 28.000 persones, un 32 % más que va dos años y el 92 % de quien tienen derechu a prestación

El Principáu realiza anguaño una inversión histórica n’atención a la dependencia, con 278 millones, superando asina la cifra más alta hasta’l momentu, los 251.625.396 euros del 2021, según informó la conseyera de Derechos Sociales y Bienestar, Melania Álvarez, na Xunta Xeneral.

Los bonos resultaos del plan de choque que punxo en marcha’l Gobiernu d’Asturies nesti ámbitu va dos años dexaron que l’Executivu central incrementar esti exerciciu en cuasi 17 millones la partida pa esti fin, a la que’l Principáu aporta más de 200 millones, el 77 % del total.

Álvarez destacó nel Parllamentu que’l Principáu foi, inclusive mientres los peores momentos de la pandemia, una de les comunidaes que más espedientes tramitaron, lo que supunxo un descensu notable de la llista d’espera. En xunto, el Gobiernu d’Asturies atiende anguaño a unes 28.000 persones dependientes, el 92 % de quien tienen derechu a estes prestaciones, y un 32 % más qu’antes de poner en marcha’l plan de choque. Amás, Derechos Sociales prevé que se superen les 30.000 persones asistíes a finales d’añu.

Mientres la so comparecencia na Xunta Xeneral, la conseyera tamién fixo balance de la segunda visita a Asturies de la ministra de Derechos Sociales y Axenda 2030, Ione Belarra, el pasáu 24 de marzu, pa visitar unu de los centros onde s’agospien parte de los 110 menores ucraínos con discapacidá que salieron del so país gracies a la collaboración ente les dos alministraciones.

Otra manera, precisó que los 1.901 mozos menores de 35 años beneficiarios de l’ayuda al arriendu de vivienda recibieron yá 1,8 millones de los más de 4,5 presupuestaos pa esti fin.