El Principáu comunica a les organizaciones agraries y cooperatives los avances nel desenvolvimientu del plan estratéxicu de la PAC

El conseyeru de Mediu Rural y Cohesión Territorial, Alejandro Calvo, comunicó a los miembros del Conseyu Agrariu, les organizaciones agraries Asaja, Coag y Uca y les Cooperatives Agroalimentaries, les meyores nel desenvolvimientu del plan estratéxicu nacional pa l’aplicación de la Política Agraria Común (PAC). Asina, esplicó que’l documentu, que’l Ministeriu d’Agricultura, Pesca y Alimentación va sacar mañana a consulta pública, recueye les peculiaridaes del modelu agroganaderu familiar y sostenible de la cornisa cantábrica.

Nesti sentíu, destacó que gracies al trabayu conxuntu d’Asturies, Cantabria, País Vascu y Galicia inclúyense les especificidaes de les esplotaciones d’estes zones, como los ecoesquemes de pastu y de siega.

Amás, les midíes del Programa de Desenvolvimientu Rural (PDR), que pasen a llamase intervenciones, caltienen l’apueste realizáu pol Gobiernu d’Asturies. Asina, les medríes más significatives, realizaes pol Principáu nel marcu del PDR, afecten a les ayudes agroambientales, nes que’l sofitu al caltenimientu de races autóctones xube un 153,7 %, y a la producción ganadera sostenible y caltenimientu del paisaxe, con aumentu del 28,3 %.

Dientro de les ayudes de producción ecolóxica, produzse un aumentu del 900 % naquelles destinaes al caltenimientu de l’apicultura ecolóxica y del 40 % pa les de ganadería ecolóxica. Nel casu de los pagos al amparu de la Rede Natura 2000, la medría asítiase nel 49,2 %, mentes que los vinculaos a zones con limitaciones naturales o indemnización compensatoria de monte medren un 106,9 %.

Estes llínies de sofitu de la PAC ayuden a la viabilidá económica de les esplotaciones, de la qu’amenorguen el riesgu d’abandonu de l’actividá. Nesti sentíu, el conseyeru informó de que yá remató’l pagu del anticipu de les ayudes directes de la PAC, que supón más de 39,6 millones. D’esta manera, procedióse al pagu de más de 16,8 millones del pagu básicu, 8,3 millones del pagu verde y 829.699 euros del complementu a mocedá. Tamién se materializó yá l’anticipu pa les esplotaciones de vacunu de lleche (6,5 millones) y p’aquelles que caltienen vaques nodrices (más de 7 millones).

Convocatoria nueva d’ayudes pa la incorporación al campu

Calvo tamién compartió coles entidaes agraries el conteníu de la convocatoria nueva d’incorporación al campu y la meyora de les esplotaciones, que se ta tramitando n’anticipáu de gastu pa la so execución a partir del 2022. Nesti sentíu, el conseyeru anunció que se van flexibilizar les condiciones p’acceder a la llinia de sofitu a les inversiones agraries, una de les demandes del sector, lo que va dexar avanzar na profesionalización y adaptación de les ayudes a la realidá actual de xestión y producción agropecuaria n’Asturies.

Nesti sentíu, les persones mayores de 40 años qu’empiecen na actividá agraria van poder optar a les ayudes de planes de meyora, yá que, d’equí p’arriba, van tener qu’acreitar que son titulares de les esplotaciones nel momentu de la certificación final. La convocatoria tamién va recoyer que, pa optar a les ayudes, va ser abondo con presentar un plan empresarial, realizáu por un técnicu, onde se demuestre que les inversiones previstes tán xustificaes y van ameyorar el rindimientu de la esplotación. Los proyectos tamién van poder contemplar les realidaes nueves de producciones agrícoles y ganaderes de calter innovador y agroecolóxicu de la comunidá

Nel alcuentru participaron tamién los directores xenerales de Ganadería y Sanidá Animal y de Desenvolvimientu Rural y Agroalimentación, Rocío Güerta y Begoña López, y los directores xenerales del Mediu Natural y Planificación Rural y Industries Agraries y Montes, David Villar y Fernando Montes, respectivamente.

Deja una respuesta

Tu dirección de correo electrónico no será publicada.

8 + siete =