- El Bopa publica les bases reguladores que van dexar a agricultores y ganaderos nuevos menores de 40 años recibir hasta un máximu de 70.000 euros
- Les subvenciones pa inversiones nos negocios van xustificase con proyectos de viabilidá y van poder acceder a elles los mayores de 40 años qu’entamen na actividá
- Tamién se crea una llinia nueva de sofitu pa l’adopción de midíes preventives qu’eviten daños de fauna montés
La Conseyería de Mediu Rural y Cohesión Territorial publica nel Boletín Oficial del Principáu (Bopa) les bases reguladores nueves de les ayudes a les inversiones n’esplotaciones agrícoles y de creación d’empreses per parte d’agricultores nuevos. Los cambeos introducíos xuben les subvenciones pa la mocedá y flexibilicen l’accesu a los fondos pa la meyora de los negocios.
D’esta miente, l’ayuda a la creación d’empreses p’agricultores nuevos, destinada a profesionales d’hasta 40 años, aumenta hasta un máximu de 70.000 euros nel casu de qu’empecipien la so actividá n’esplotaciones estensives con llimitaciones naturales, en zones de monte altu o n’espacios naturales protexíos de la Rede Natural. Esta xubida tamién ta suxeta a l’adopción de midíes preventives pa evitar posibles daños al ganáu pol ataque de fauna montés.
Per otru llau, suavícense les condiciones pa concurrir a la llinia de sofitu a les inversiones n’esplotaciones, un aspectu especialmente demandáu pol sector, qu’avanza na profesionalización y dexa afaer les ayudes al contestu agropecuariu actual d’Asturies. Estes subvenciones diríxense a persones mayores de 40 años que s’empecipien na actividá agraria. D’equí p’arriba, van tener qu’acreditar que son titulares d’una esplotación nel momentu de la certificación final.
En relación colos planes de meyora, establezse la presentación d’un plan empresarial, realizáu y visáu por un técnicu, que demuestre que les inversiones previstes tán xustificaes y van tener impactu nel rendimientu global de la esplotación.
Per otra parte, destaca la puesta en marcha d’una nueva llinia destinada a impulsar midíes preventives pa evitar daños de la fauna montés. Trátase d’una ayuda complementaria a la indemnización por daños. Nesti casu, va ser subvencionable’l 100% de la inversión.