El Principáu analiza l’estudiu que va sirvir de base para la ellaboración de la estratexa asturiana frente al cambéu climáticu

La Comisión de Coordinación d’Acción pol Clima empecipió güei l’analís del diagnósticu previu sobre los efectos del cambéu climáticu nos ecosistemes naturales y los sectores socioeconómicos de la comunidá, realizáu pol Institutu de Recursos Naturales y Ordenación del Territoriu (Indurot). L’estudiu, que va tar disponible nos próximos díes na páxina web del Principáu, va sirvir de base pa la ellaboración de la Estratexa d’Acción pol Clima d’Asturies.

Ente los sectores que s’analicen nel documentu figuren la pesca, l’agricultura, la ganadería, la silvicultura, la enerxía, la industria, el tresporte, el turismu y el poblamientu, identificando los riesgos seguros, mesmo los probables y los inciertos.

Esta comisión, que la so xunta de güei coincide cola celebración del Cume Internacional del Clima (COP26), en Glasgow, creóse’l pasáu febreru cola fin d’asesorar sobro’l cambéu climáticu, analizar les midíes pa la transición ecolóxica qu’afecten a la comunidá ya identificar oportunidaes tecnolóxiques y de captación de financiamientu.

La viceconseyera de Mediu Ambiente y Cambéu Climáticu, Nieves Roqueñí, que preside esti órganu, esplicó los conteníos relativos al cambéu climáticu incluyíos nel anteproyectu de Llei de Calidá Ambiental, anguaño en tramitación.

Asina, Roqueñí destacó que’l testu incorpora una propuesta sobre presupuestos climáticos sectoriales”, qu’implica’l compromisu de l’Alministración autonómica, los sos organismos y entes públicos, de destinar parte del so presupuestu añal a actuaciones contra’l cambéu climáticu, tanto nel ámbitu del amenorgamientu como nel de l’adaptación. Nel anteproyectu asígnase a la Comisión de Coordinación d’Acción pol Clima la responsabilidá de proponer añalmente’l porcentaxe presupuestariu que cada departamentu va destinar a tales actuaciones.

Na xunta participaron el viceconseyeru d’Infraestructures, Movilidá y Territoriu, Jorge García; los directores xenerales de Calidá Ambiental y Cambéu Climáticu, Pablo Álvarez Cabrero; d’Enseñances Profesionales, Javier Cueli; de Mediu Natural y Planificación Rural, David Villar; d’Innovación, Investigación y Tresformamientu Dixital, Iván Aitor Lucas, y d’Asuntos Europeos, Javier Vila, y los directores xenerales de Ganadería y Sanidá Animal, Rocío Huerta, y d’Enerxía, Minería y Reactivación, Belarmina Díaz.

Fonte nota de prensa Gobiernu d’Asturies