El Principáu abre’l plazu pa solicitar les ayudes directes por nacencia y adopción

• Derechos Sociales destina 4,5 millones a estes subvenciones, a les que van poder optar aquelles families con ingresos añales que nun pasen de los 45.000 euros

El Boletín Oficial del Principáu d’Asturies (BOPA) publica güei les ayudes directes por nacencia y adopción aprobaes pol Conseyu de Gobiernu’l 11 de marzu. La midida, que busca fomentar la natalidá y combatir la perda demográfica, supón un gastu de 4.595.000 euros p’anguaño.

Les families de los neños y neñes nacíos o adoptaos a lo llargo d’anguaño qu’axunten los requisitos establecíos van poder optar a un pagu de mil euros si los sos ingresos añales nun superen los 45.000 euros. La Conseyería de Derechos Sociales y Bienestar, órganu xestor de les subvenciones, calcula que más del 80 % de les unidaes familiares que tuvieren un fíu o adoptaren a un menor van poder beneficiase d’esta midida.

Los fondos destinaos a esta iniciativa tienen calter plurianual y van distribuyise d’esta manera: 3.595.000 euros anguaño y 1.000.000 nel 2023, cola mira de cubrir les nacencies y adopciones que se produzan a lo llargo del exerciciu, dende’l 1 de xineru hasta’l 31 d’avientu, dambes feches incluyíes.

Les solicitúes van poder presentase de manera telemática na páxina https://sede.asturias.es, introduciendo’l conceptu AYUD nel buscador asitiáu na parte superior derecha de la páxina, y de manera presencial nes Oficines d’Atención Ciudadana del Principáu.

El plazu pa presentar les solicitúes poles nacencies y adopciones que se produxeren ente’l 1 de xineru y el 31 de marzu va tar abiertu dende mañana pol plazu d’un mes.

Más información: https://cutt.ly/YSTAOLW