El Gobiernu d’Asturies movilizó yá 200,4 millones de fondos europeos del Mecanismu de Recuperación, casi la metá de los asignaos hasta agora

• El Principáu convocó subvenciones por un importe de 41,4 millones y firmó convenios por otros 158,2 .
• La comunidá tien confirmaos 410.300.000 euros al traviés de les distintes víes .

La conseyera de Facienda, Ana Cárcaba, cifró en 200,4 millones los fondos europeos movilizaos yá pol Gobiernu d’Asturies, lo que supón el 48,8% del total de los 410,3 que tien confirmaos y asignaos la comunidá dientro del Mecanismu de Recuperación y Resiliencia.

Cárcaba facilitó esos datos na Xunta Xeneral, onde esbilló les cifres que se remanen anguaño al respective de les cuantíes provenientes d’estos fondos. Asina, de los 410,3 millones asignaos al Principáu hasta la fecha, 41,4 tán movilizaos al traviés de siete convocatories de subvenciones y otros 158,2 por aciu la firma de los respectivos convenios. A estes cantidaes súmense, amás, los 800.000 euros que tán en fase de contratación pública para la modernización de les sales de vistes xudiciales. ‘Toes estes cifres tán disponibles pa la ciudadanía al traviés del Portal de Tresparencia, onde s’actualicen dacuando’, esplicó la titular de Facienda.

La conseyera aseguró que’l Principáu trabaya cola seguridá y la dilixencia qu’esixe’l momentu’ y destacó’l compromisu de l’Alministración autonómica pa entainar la tramitación d’estes partíes, yá que casi’l 70% de les tresferencies d’estos fondos realízase nel últimu trimestre de 2021 y nos primeros díes d’esti añu.

Ana Cárcaba sorrayó que’l Gobiernu d’Asturies tien una amplia esperiencia na xestión de fondos europeos y que’l Principáu tuvo siempre a la cabeza de les comunidaes autónomes tocantes a la execución d’estes partíes.