El Gobiernu d’Asturies llicita un nuevu contratu pa reforzar la conectividá aérea con ocho destinos internacionales

• El concursu de promoción turística incrementa les conexones directes, que pasen de cinco a ocho: Londres, París, Düsseldorf, Bruxeles, Roma, Milán, Lisboa y un octavu destín entre Ámsterdam, Frankfurt y Dublín
• El Principáu llideró, con casi 10 puntos de diferencia, la recuperación de pasaxeros nos aeropuertos de la cornisa cantábrica l’añu pasáu

El Gobiernu d’Asturies sacó güei a llicitación un nuevu contratu para fortalecer la conectividá aérea internacional. El concursu de promoción turística tien un presupuestu global de 10,1 millones pa una programación que se va estender hasta abril de 2026 y qu’incrementa de cinco a ocho les conexones.

La ufierta establez enllaces directos con Londres, París, Düsseldorf, Bruxeles, Roma, Milán, Lisboa y un octavu destín entre Ámsterdam, Frankfurt y Dublín. Los destinos escoyíos obedecen a un analís de los datos históricos de pasaxeros, principales tráficos puntu a puntu con orixe y destín Asturies, datos de pasaxeros indirectos que realicen escales n’otros aeropuertos p’algamar el so destín y enclinos de mercáu realizaos nos principales buscadores de vuelos.

Ente les novedaes de la ufierta destaca la inclusión de trés nuevos destinos internacionales: París, Roma y un terceru que va salir de la terna Ámsterdam, Frankfurt y Dublín, y que se xunen a les cinco capitales internacionales que yá recoyía l’anterior llicitación.

El concursu pa fomentar la conectividá internacional realízase al traviés de la sociedá pública Recrea y les empreses interesaes van poder presentar ufiertes hasta’l 10 de febreru. Asturies lideró, con casi 10 puntos de diferencia, la recuperación de pasaxeros nos aeropuertos de la cornisa cantábrica l’añu pasáu, periodu nel que tamién se desestacionalizó la ufierta de vuelos nacionales con una trupa operativa en tol exerciciu.

La compañía Volotea interpunxo’l 25 de setiembre un recursu contra la llicitación del Serviciu de promoción turística, cultural y polu d’actividá económica al traviés de la so conectividá aérea directa coles principales ciudaes europees. Tres el resolvimientu del Tribunal Alministrativu Central de Recursos Contractuales, y n’ares d’entainar la tramitación, la Viceconseyería d’Infraestructures, Movilidá y Territoriu optó por resolver el mentáu procedimientu y avanzar nesta nueva llicitación qu’incrementa de 5 a 8 los destinos internacionales.

El concursu recueye les considerances del tribunal que suponen un cambéu de criteriu frente a anteriores pronunciamientos del mesmu órganu alministrativu, que refrendaron llicitaciones de campañes de promoción de dellos destinos arrexuntaes nun únicu llote, acutando places mínimes de los aviones y otros condicionantes operativos que contribuyíen a garantizar un óptimu grau de penetración de l’aerollinia nos distintos mercaos. Énte’l cambéu d’escenariu, la nueva llicitación prevé 8 llotes independientes y va valorar les frecuencies y places ufiertaes, el plan de marketing y promoción y la ufierta económica.​​