- El Principáu dedica cerca de 50.000.000 euros a l’acción concertada y 12.000.000 a delles llinies d’ayuda y subvenciones nominatives que concede la Conseyería de Derechos Sociales
- Melania Álvarez participó güei na presentación del nuevu modelu territorial de convocatories que la Fundación ‘la Caixa’ llanza na comunidá
El Gobiernu d’Asturies destina anguaño 62 millones a les entidaes ensin ánimu d’arriquecimientu pa la prestación de distintos servicios al traviés de l’acción concertada (50 millones) y les distintes llinies d’ayudes y subvenciones nominatives (12 millones) que convoca la Conseyería de Derechos Sociales y Bienestar. La conseyera Melania Álvarez ufiertó güei estos datos na presentación del nuevu modelu territorial de convocatories sociales que la Fundación ‘la Caixa’ llanza nel Principáu.
Na so intervención, Álvarez recordó la importancia de la puesta en marcha de la Llei del Principáu 3/2019, de 15 de marzu, que regula l’acción concertada y otorga mayor protagonismu y participación na prestación de servicios a les organizaciones non gubernamentales.
Tamién valoró’l llabor fundamental” d’entidaes como la fundación ‘la Caixa’ y sorrayó el so decidíu apueste pola protección de los colectivos más vulnerables. “El so sofitu resulta clave pa les alministraciones públiques. Equí, nel Principáu, tamos bien acostumaos a trabayar en comuña, como verdaderos aliaos, pa ufiertar una respuesta integral a les necesidaes más acucioses de la sociedá actual”, indicó la titular de Derechos Sociales.
De 1999 a 2021, la fundación ‘la Caixa’ sofitó 353 proyectos nel Principáu, con una inversión de 6,7 millones que permitió atender a más de 27.700 persones en campos rellacionaos col avieyamientu, la discapacidá, los trestornos mentales, la humanización de la salú, la llucha contra la probeza y l’esclusión, l’insertamientu sociolaboral y l’acción social.
Nel actu de presentación del nuevu modelu territorial de convocatories sociales intervinieron, amás de la conseyera, el subdireutor xeneral de la fundación, Marc Simón, y el director territorial de Caixabank nel Norte, Juan Pedro Badiola.
Les organizaciones del tercer sector van poder presentar del 29 de marzu al 28 d’abril los sos proyectos a esta nueva llinia d’ayudes, que dobla la so inversión na comunidá al respective de 2021, con una dotación d’un millón.