El Gobiernu d’Asturies defende la creación d’un fondu específicu pa les comunidaes afectaes pola despoblación

• El Principáu insiste en que’l modelu de financiamientu tien que se diseñar teniendo en cuenta les necesidaes reales de gastu.
• La conseyera de Facienda treslladó a la Mesa de Financiamientu les valoraciones al documentu del ministeriu, nes que se reclama la concreción d’una cartera de servicios.

La conseyera de Facienda, Ana Cárcaba, informó ayeri a la Mesa de Financiamientu de les valoraciones y propuestes presentaes pol Gobiernu d’Asturies al documentu unviáu n’avientu pol Ministeriu de Facienda sobre’l cálculu de la población axustao nel marcu de la futura reforma del sistema de financiamientu autonómicu. La respuesta destaca la necesidá de definir un modelu basáu nes necesidaes de gastu, cuestión que nun se reflexa nel testu recibíu, y de crear un fondu específicu adicional pa les comunidaes afectaes pola despoblación.

Nes sos valoraciones, el Principáu asegura que la propuesta del Estáu queda lloñe del planteamientu autonómicu, porque nun s’analicen les necesidaes de gastu, sinón que se reparten recursos en función de determinaos indicadores, nin se define la cartera de servicios a financiar.

Cárcaba, que tuvo acompañada pola directora xeneral de Finances y Economía, Mar García Salgado, tamién comunicó a los grupos que’l Principáu considera que’l documentu unviáu nun ye una propuesta de reforma que dexe facer valoraciones, sinón que se trata d’un informe técnicu, centráu na población axustao, y que cuasimente nun concreta nenguna propuesta. Por eso, a la conseyera paez-y necesario conocer tolos elementos del modelu que se propón y que, primero d’establecer cualquier base de cálculu, les comunidaes sepan el volume de recursos que se va repartir. Asturies tamién considera vital que l’Estáu aumente esos recursos, una y bones el sistema actual demostró ser insuficiente.

El Gobiernu d’Asturies aboga por dar más importancia al pesu de los gastos sanitarios nel modelu nuevu porque los recursos actuales son claramente escasos. Tocante al ámbitu educativu, defende la introducción del gastu universitariu y tomar en consideranza’l númberu real d’alumnos. Sicasí, cree que’l financiamientu de la etapa de 0 a 3 años tendría que s’encarar con un fondu específicu en función del alumnáu potencial, una y bones la situación ente territorios resulta heteroxénea. Pela so parte, no relativo a los servicios sociales apuéstase por dar más pesu a la población mayor y caltener el financiamientu del sistema de la dependencia, al marxe del modelu. Pa los demás servicios, nun se considera axustao un repartu a tenor de la población.

El Principáu tamién xulga fundamental dotar de más pesu a les variables non poblacionales. Asina, valora como perpositiva la introducción de los costos fixos, pero paez-y que la dispersión tenía de ganar importancia y que tamién tenía que se tomar en consideranza’l sobrecostu de la orografía na prestación de tolos servicios.

La respuesta del Gobiernu d’Asturies recueye tamién los oxetivos del alcuerdu que firmaron en xunu del 2020 la mayoría de los partíos con representación na Xunta Xeneral, según del documentu soscritu poles ocho comunidaes que s’axuntaron en payares en Santiago de Compostela y definieron una serie de principios comunes.