El Gobiernu d’Asturies convoca les ayudes a les industries agroalimentarias y forestales, a les que destina 9,3 millones

• Les empreses interesaes tienen hasta’l 18 de febreru pa presentar los proyectos a la convocatoria 2022.
• Esta llinia dexó sofitar 84 iniciatives nel 2021.

El Boletín Oficial del Principáu d’Asturies (BOPA) publicaba el martes la convocatoria 2022 de subvenciones a les industries en tresformamientu, comercialización y/o desenvolvimientu de productos agrícoles y n’inversiones en tecnoloxíes forestales. Estes ayudes, dotaes con 9,3 millones y cofinanciaes pol Fondu Européu Agrícola de Desenvolvimientu Rural (Feader), favorecen la creación d’empléu en zones rurales, l’afitamientu d’un sector agroalimentariu modernu y de la industria forestal.

Les empreses interesaes tienen hasta’l 18 de febreru pa presentar los proyectos. Daqué más de seis millones correspuenden a ayudes pa les inversiones en tresformamientu, comercialización y/o desenvolvimientu de productos agrícoles, y 3,25 millones a les inversiones en tecnoloxíes forestales.

Les subvenciones cubren un máximu del 40 % de la inversión y contribuyen a ameyorar los sistemes de tresformamientu, comercialización y desenvolvimientu de productos agrarios per aciu del fomentu de la producción local, la venta directa y les canales curties de comercialización. Tamién favorecen la modernización de la industria agraria y agroalimentaria.

Amás, dexen sofitar acciones qu’aumenten el rindimientu global de les esplotaciones y favorezan el caltenimientu del empléu, la incorporación de tecnoloxíes, los procedimientos pa la comercialización de productos de mayor calidá y l’accesu a mercaos nuevos. D’esta miente, ayuden a la creación de redes locales de recoyida, recepción, almacenamientu o clasificación, de la que contribuyen al afitamientu de sistemes de calidá y seguridá alimentaria.

Nel casu de les industries forestales, les ayudes busquen fortalecer el potencial del sector cola mira d’aumentar la capacidá económica de los montes al traviés de la mecanización de procesos.

Na convocatoria del 2021 concediéronse ayudes a 84 proyectos, de los que 36 correspondíen a iniciatives de les industries agroalimentaries y 48 a les forestales.