La Conseyería de Mediu Rural y Cohesión Territorial va crear un bancu d’esplotaciones que va ayudar a favorecer la continuidá de l’actividá nel mediu rural y el relevu xeneracional. El director xeneral d’Infraestructures Rurales y Montes, Fernando Prendes, anunció na feria Agropec que los primeros pasos pa ponelu en marcha van empezar cola redacción de la normativa que regule la so creación y funcionamientu.
Esti organismu va tar adscritu a la comisión rexonal del Bancu de Tierres, que se va encargar d’intermediar ente quien van dexar l’actividá y nun tienen socesión na so ganadería o esplotación y llabradores y ganaderos nuevos que quieran incorporase al sector primariu. La iniciativa busca impulsar la renovación xeneracional n’esplotaciones con titulares d’edá avanzada, evitar que zarren y aprovechar la estructura empresarial existente.
En collaboración col sector, la conseyería va realizar un inventariu d’aquelles esplotaciones viables que cuerran riesgu de zarrar por xubilación de los sos propietarios nun periodu de cinco años. Tres d’esi análisis, va escoyer aquelles que seyan susceptibles de relevu por persones ayenes al ámbitu familiar.
Esta midida va dexar caltener n’activo les esplotaciones, amás de la incorporación de los ganaderos nuevos a actividaes yá en marcha, con tolos sos recursos y rentabilidaes, ensin falta de tener qu’empezar de cero. Ye importante sobre manera pa garantizar el suministru a les empreses láctees, porque los titulares de más del 60 % de les esplotaciones ganaderes de vacunu de lleche tienen más de 55 años.
El bancu d’esplotaciones tamién va ufiertar fórmules que garanticen el cobru del arriendu al propietariu cuando se trate d’un arrendamientu y la tresmisión nos casos de compra-venta. Amás, esti procesu va acompañase de bonificaciones fiscales.
Na feria Agropec tamién se desenvolvió una sesión informativa sobre les aplicaciones pa dispositivos móviles del sistema de xestión d’ayudes de la Política Agraria Común (PAC), puestes en marcha pol Fondu Español de Garantía Agraria (FEGA).
Los ganaderos y llabradores disponen de l’aplicación móvil SGApp pa consultar tolos detalles del so espediente d’ayudes de la PAC, amás de los controles alministrativos que lu afecten o’l cálculu de l’ayuda que-yos correspuende.
Amás, otra aplicación móvil, SGAFot, dexa sacar semeyes xeorreferenciaes de les parceles declaraes, de manera qu’estes imáxenes valgan d’evidencia pa contestar a los controles alministrativos de los recintos énte cualquier incidencia. D’esta manera, fai entainar y facilitar los trámites porque queda rexistrada la localización dende onde se saca la semeya, la orientación, la fecha y hora a la que se sacaron y los datos de la parcela y espediente al que pertenecen.
Fonte: Nota de prensa del Gobierno d’Asturies
Desde el 3 hasta el 15 de octubre, la Casa de Cultura de La Pola…
La Gerencia del Programa Leader de la Montaña Central de Asturias, en colaboración con la…
El Colegio Sagrada Familia El Pilar acoge del 10 al 12 de octubre una nueva…
La Sociedad Deportiva Lenense Proinastur sufrió este domingo su primera derrota de la temporada tras…
Lena ha vuelto a demostrar su compromiso solidario con dos eventos que, en apenas una…
El Administrador de Infraestructuras Ferroviarias (Adif) ha adjudicado el primer contrato para la renovación integral…