El conseyeru d’Industria solicita la comparecencia na Xunta Xeneral a petición propia pa esplicar la situación d’Alu Ibérica

• Enrique Fernández va informar de les xestiones feches pol so departamentu pa intentar dar continuidá a l’actividá productiva y al empléu n’Avilés
• “Alcoa y los socios, Parter y Riesgo, son los únicos responsables de la situación tan crítica na que s’alcuentren los trabayadores”, afirma’l titular d’Industria

El conseyeru d’Industria, Empléu y Promoción Económica, Enrique Fernández, solicitó la comparecencia a petición propia na Xunta Xeneral del Principáu pa tratar la situación d’Alu Ibérica y esplicar les xestiones realizaes pol so departamentu.

Fernández señaló que solicitó la comparecencia “énte la deriva de los acontecimientos y l’espiral de acusaciones infundaes continues que tán treslladando a la opinión pública dellos grupos políticos y dalgún representante de el trabayadores, qu’en nengún casu s’afayen a la realidá de los fechos”.

El titular d’Industria esplicó que fai esta solicitú “cola mesma franqueza y el mesmu espíritu de tresparencia” que siempre presidió la so actuación dende l’asunción de responsabilidaes nel Gobiernu d’Asturies.

Coles mesmes, recuerda que “llueñe de lo que se ta treslladando l’únicu y principal responsable de la situación actual ye la multinacional Alcoa y les sos empreses socies, Parter y Grupu Industrial Riesgu, de les que les posibles responsabilidaes tán sustanciándose anguaño en see xudicial. Elles son les culpables de la complexa situación de la planta d’aluminiu d’Avilés y de los graves perxuicios causaos a los trabayadores y a les sos families”.

Fernández tamién insisite en que “la prioridá y la principal esmolición del Gobiernu d’Asturies fueron y siguen siendo los trabayadores y les families que, directa o indirectamente, dependen de l’actividá productiva d’Alu Ibérica”. Nesti sentíu, repite que la planta avilesina ye un activu industrial curiosu pa potenciales inversores, pero han de ser éstos quien tienen d’esclariar el so interés y poner sobre la mesa una propuesta formal y con condiciones clares.​​