Educación va implantar Inglés pal alumnáu de trés años y va potenciar el so aprendizaxe nel restu de la etapa d’Infantil

• La conseyera Lydia Espina anuncia que’l currículu que peracaba’l Gobiernu d’Asturies va dar prioridá a la enseñanza de les destreces de la comunicación oral.​​​​​​​

La Conseyería d’Educación va potenciar la enseñanza d’Inglés dende Infantil cola so implantación, per primer vez, pal alumnáu de trés años, lo qu’aumenta la carga horaria total de la etapa. Amás, va dar prioridá, con una perspectiva lúdica, al aprendizaxe de les destreces de la comunicación oral. Estos conteníos van formar parte del currículu de la etapa, que ta peracabando la Dirección Xeneral d’Ordenación, Evaluación y Equidad Educativa.

La conseyera, Lydia Espina, anunció estes novedaes esta mañana na so visita a la esposición Mandilones de Colores, en Xixón. La muestra conmemora los diez años de funcionamientu d’un colectivu integráu por cinco escueles públiques d’Infantil de segundu ciclu, con alumnáu d’edaes ente los trés y los cinco años. Espina tuvo acompañada poles direcciones de los centros y pola alcaldesa, Ana González.

La conseyera esplicó qu’hasta agora la enseñanza d’Inglés llimitábase a los cursos de cuatro y cinco años, con un máximu de dos a trés hores selmanales en xunto, en tola etapa, en función de la organización de cada centru.

Col nuevu currículu que ta peracabando’l Gobiernu d’Asturies, la carga horaria va ser d’un mínimu de trés y un máximu de cuatro hores selmanales en tola etapa y los centros van tener qu’apoyar, polo menos, una hora a la selmana nel primer cursu, pal alumnáu de trés años.

Al marxe de la enseñanza de llingües estranxeres, Lydia Espina destacó que la implantación de la nueva Llei orgánica d’Educación confier calter educativu per primer vegada a la etapa de 0-3. Tamién sorrayó l’enfoque competencial qu’apurre a tou Infantil y el fechu de que s’entama en trés árees: crecimientu n’harmonía, descubrimientu y esploración del entornu, y comunicación y representación de la realidá.