Educación refuerza’l so apueste pola FP con dos nuevos ciclos y más de 9.500 places pal primer cursu

• Los estudios que se van implantar son Paisaxismu y Mediu Rural, que se va impartir en Colunga, y Estilismu y Dirección de Peluquería, que se va enseñar n’Uviéu
• La dirección d’Enseñances Profesionales va abrir trés graos rellacionaos con materies de salú p’adaptar la ufierta a la elevada demanda existente
• La planificación de la conseyería inclúi otros cuatro cursos d’especialización rellacionaos coles tecnoloxíes emerxentes

El Gobiernu d’Asturies va reforzar la cartera de titulaciones de Formación Profesional (FP) el próximu cursu (2022/2023) con dos nuevos ciclos formativos y l’ampliación d’otros 9 que yá existen. Amás, van incluyise 4 cursos d’especialización. En total, la Conseyería d’Educación va ufiertar 9.582 places pa los primeros cursos de grau mediu y superior, distribuyíes en 94 ciclos presenciales y 23 na modalidá a distancia.

Estos son dalgunos de los datos más relevantes qu’ufiertaron güei la conseyera d’Educación, Lydia Espina y el director xeneral d’Enseñances Profesionales, Javier Cueli, na presentación del catálogu de títulos pal próximu cursu, que tuvo llugar nel IES Luces, de Colunga.

“Tenemos una ufierta dinámica que crez nun doble sentíu: adáptase a la demanda del alumnáu y tamién a la nueva ufierta aprobada pol ministeriu”, afirmó Espina. La conseyera destacó qu’Asturies cunta “con ún de los catálogos de títulos más amplios del país” y añedió que “cursu a cursu escuchamos tanto al empresariáu como al alumnáu pa conocer les sos necesidaes”.

Precisamente, nel IES Luces va impartise ún de los ciclos de nueva implantación. Concretamente, el de Paisaxismu y Mediu Rural, que complementa la so ufierta específica alredor a la formación agraria. El IES Luces yá imparte Ganadería, Xardinería, Xestión Forestal y Producción Agroecológica.

L’otru ciclu formativu de nueva implantación ye’l d’Estilismu y Dirección de Peluquería, que se va impartir nel IES Pérez de Ayala, n’Uviéu. Dambos ciclos son de grau superior.

Paisaxismu y Mediu Rural ta pensáu pa quien quieran enfocar la so actividá llaboral escontra empreses dedicaes al diseñu de xardinos col usu de les nueves tecnoloxíes, a planiar proyectos de restauración paisaxística, supervisar la instalación y el caltenimientu de zones verdes y campos deportivos, inventariar y evaluar árboles, programar la producción de granes y plantes en viveru o entamar la collecha, la recueya y el caltenimientu de productos agrícoles.

Estilismu y Dirección de Peluquería abre la puerta a trabayar na xestión técnica de peluqueríes como especialista en tratamientos o cuidaos capilares o asesor d’imaxe. Esti ciclu tamién ta diseñáu pa quien quiera desenvolver la so actividá profesional en clíniques, centros de medicina especializaos y de ciruxía estética.

Adaptación de demanda y ufierta

Per otra parte, ente los ciclos que s’amplíen pal próximu cursu inclúyense trés diseñaos p’adaptar la ufierta a l’alta demanda exstente y tratar de desaniciar les llistes d’espera pa cursalos. Toos ellos tán rellacionaos cola salú. Cuidos Auxiliares d’Enfermería y Farmacia y Parafarmacia, dambos de grau mediu, van impartise nel IES Isla Deva de Piedrasblancas. Estreme, tamién se va ufiertar Hixene Bucodental, de grau cimeru y que se va estudiar nel CIFP Cerdeño, n’Uviéu.

Cola voluntá d’ampliar les posibilidaes nel entornu rural van ufiertase los ciclos de grau mediu Sistemes Microinformáticos y Redes nel IES Altu Nalón, en Los Barreros (Llaviana); Producción Agroecológica, nel IES Conceyu de Tinéu y Guía nel Mediu Natural, nel IES El Sueve, de Les Arriondes. Tamién se va añedir a la ufierta’l ciclu de Dirección de Cocina, que se va impartir nel IES Llanes, onde yá existía’l grau mediu de la disciplina.

El CIFP La Llaboral, per otra parte, abre un grupu billingüe nel ciclu de Marketing y Publicidá. En modalidá a distancia, el IES Dr. Fleming va impartir Alministración y Finances, al envís d’atender a los posibles usuarios de l’Alministración Pública.

Cursos d’especialización

Tocantes a los cursos d’especialización o másteres, la FP va incorporar cuatro de nueva implantación, que s’añaden a los trés yá existentes. Toos ellos tán rellacionaos coles tecnoloxíes emerxentes.

Estos cursos van ser: Audiodescripción y Subtitulación, nel CIFP Imaxe y Soníu (Llangréu); Caltenimientu y Seguridá en Sistemes de Vehículos Híbridos y Eléctricos, nel IES Sánchez Lastra (Mieres del Camín); Intelixencia artificial y Big Data, nel IES Dr. Fleming (Uviéu) ya Instalación y Caltenimientu de Sistemes Conectaos, que se va estudiar nel CIFP Avilés y nel IES Fernández Vallín (Xixón).

Tou esti catálogu permite incrementar el númberu de places pal nuevu alumnáu, que pasa de 8.882 a 9.582. Amás, el númberu de ciclos aumenta de 92 a 94.