La Conseyería d’Educación amplió esti cursu l’importe máximu de l’ayuda individualizada al tresporte por estudiante, al pasar de 6.000 a 8.000 euros. La convocatoria yá se publicó nel Boletín Oficial del Principáu d’Asturies (BOPA) y el plazu pa presentar solicitúes va permanecer abiertu hasta’l día 26.
Estes ayudes tán dirixíes al alumnáu que cumple los requisitos pa ser usuariu de tresporte escolar, d’alcuerdu cola resolución publicada’l 12 de mayu del 2021, pero que nun pue facer usu de les rutes establecíes pal centru educativu onde ta matriculáu. L’oxetivu ye sufragar los gastos xeneraos nel desplazamientu, yá sía hasta la parada que-y correspuende o, nel so casu, hasta’l mesmu colexu.
La convocatoria establez distintes modalidaes. Asina, al alumnáu que se mueva nun serviciu regular de viaxeros, va abonáse-y el preciu del billete o del abonu qu’adquiera.
Pa los demás casos, ufiértense trés alternatives. A quien se muevan pelos sos propios medios, va abonáse-yos el quilometraxe a una tarifa de 0,21 euros/quilómetru. La cuantía pa quien recurran a un taxi va ser de 0,59 euros/quilómetru. En casu de que’l serviciu tenga un preciu escepcional superior y siempre qu’exista un informe previu del organismu competente en materia de tresporte, va abonase’l costu real.
L’importe total de l’ayuda va calculase de manera proporcional a los díes lectivos nos que l’alumnáu beneficiario va precisar movese. El pagu va realizase, desque se resuelva la convocatoria, por aciu un ingresu únicu.
Fonte: Nota de prensa Gobiernu d’Asturies