Derechos Sociales va aumentar hasta un 50 % l’ayuda económica a persones dependientes que reciben servicios d’empreses acreitaes

• La midida, que va tener efectos retroactivos a 1 de xineru, va suponer un gastu de 8 millones y va favorecer a 2.646 ciudadanos
• La Conseyería qu’encabeza Melania Álvarez calcula qu’a lo llargo d’anguaño van poder sumase otros 1.800 beneficiarios

El Principáu trabaya nuna resolución nueva que recueya un aumentu d’hasta’l 50 % de la cantidá de les prestaciones económiques empobinaes a les persones dependientes que reciben servicios d’atención al traviés d’empreses acreitaes, hasta algamar les cantidaes máximes fixaes pol Gobiernu central.

Esta midida, que supón un gastu calculáu de 8 millones, aplicaríase tamién a quien decida evitar la institucionalización y tenga’l sofitu d’un asistente personal. En total, podríen beneficiase 2.646 persones, a les que se prevé que se sumen otres 1.800 a lo llargo d’anguaño.

Na práctica, la medría na ayuda va depender de la capacidá económica de cada beneficiariu y de la clas de serviciu qu’use: centru de día, ayuda a domiciliu o atención residencial. Por exemplu, una persona dependiente de 75 años con una capacidá económica de 700 euros mensuales y un grau I de dependencia va pasar de recibir 300 euros pol serviciu de residencia a 786,58. Nel casu del centru de día, pasaría de 145,34 a 254 euros, y de 120 a 180 na ayuda a domiciliu.

La conseyera de Derechos Sociales y Bienestar, Melania Álvarez, anunció esta iniciativa na so comparecencia na Xunta Xeneral, onde destacó que, con esta actuación, l’Executivu autonómicu “da cumplimientu efectivu a los compromisos alcordaos col Estáu pa desenvolver el Sistema pa l’Autonomía y l’Atención a la Dependencia”.