Coxersa xestionó más de 126.400 tonelaes de residuos separaos nos conceyos l’añu pasáu, un 26 % del total

• La recoyida selectiva de papel y cartón, envases llixeros y vidriu aumentó un 2,6 % y la de materia orgánica, un 15 %.
• Sobrescobiu y Xixón son los conceyos con mayor participación vecinal na separación de refugayes.

El Consorciu pa la Xestión de Residuos Sólidos d’Asturies (Coxersa) xestionó l’añu pasáu 126.433 tonelaes de materiales clasificaos y depositaos pola ciudadanía nos contenedores de recoyida separada o na rede de puntos llimpios. Esta cantidá equival al 26 % del total de residuos municipales y representa un llixeru ameyoramientu al respective del 25 % del 2020. Asturies ta tovía perbaxo del oxetivu llegal del 55 % que se debe llograr nel 2025, según establez la Unión Europea.

La xerente de Coxersa, Paz Orviz, entregó esta información a los miembros de la comisión delegada, que se reunió esta mañana n’Uviéu cola presidencia del conseyeru d’Alministración Autonómica, Mediu Ambiente y Cambéu Climáticu, Juan Cofiño.

En total, los residuos domésticos y comerciales (recoyíes municipales y puntos llimpios) xestionaos nel 2021 al traviés de Coxersa xubieron a 485.379 tonelaes, un 1,17 % más que l’añu anterior. D’elles, 358.946 correspuéndense cola llamada fracción resto, esto ye, la basura entemecida que se deposita nel vertideru central de La Zorera.

Na recoyida selectiva, 11 de los 78 conceyos tán percima de la media d’Asturies y Sobrescobiu y Xixón tán nos puestos de cabeza, con un 38 y un 36 %, respectivamente. Síguenlos, n’orde de mayor a menor, Cuaña (35 %), Castropol (34 %), Llangréu (33 %), Somiedu (32 %), Mieres (31 %), Carreño (30,5 %), Tapia (30 %), Uviéu (29 %) y Ayer (26 %).

En total, na comunidá recoyéronse 25.002 tonelaes de papel y cartón, un 2,39 % más que nel 2020; 16.534 tonelaes d’envases llixeros (recipientes de plásticu, llates, briks, porexpan y otros), lo que supón una medría del 2,6 %, y 17.729 tonelaes de botes y botelles de vidriu, cuasi un 3 % más. Por tanto, nos contenedores azules, mariellos y verdes recoyéronse 59.265 tonelaes, 1.499 más que nel 2020, lo que representa un aumentu del 2,6 %.

Les cifres de la recoyida separada incluyen los resultaos de la rede de puntos llimpios d’Asturies, esto ye, los centros onde se reciben los muebles, los escombros d’obres pequeñes, los restos vexetales de fradadures y siegues, y otros residuos reciclables como piles y bateríes, aceites, testiles y electrodomésticos.

Asina mesmo, nel porcentaxe del 26 % tamién s’incluye lo recoyío de manera separada nel contenedor marrón, dedicáu a la materia orgánico (restos d’alimentos cocinaos y non cocinaos, fundamentalmente), que nel 2021 llegó a les 8.986,42 tonelaes, un 15 % más que nel 2020. El llamáu quintu contenedor ta implantándose de manera progresiva y funciona nesti momentu en 16 conceyos: Avilés, Carreño, Castrillón, Castropol, Corvera, Xixón, Grau, Llangréu, Llanera, Llanes, Uviéu, Mieres, Noreña, Siero, Sobrescobiu y Tapia.

Pa conocer la cifra total de residuos municipales que se someten a procesos de preparación pa la reutilización y recicláu n’Asturies, ye menester añedir a los de Coxersa los datos de los xestores privaos; sobre manera no relativo a aceites vexetales usaos, testiles, vieyos aparatos eléctricos y electrónicos, y restos de piles y acumuladores, ente más otros.