- Les meyores na planificación de compres pa amenorgar residuos, les actuaciones pa ganar eficiencia enerxética o l’atención a la discapacidá son dalgunes de les iniciatives que se van valorar pa llograr la distinción
La viceconseyera de Turismu, Graciela Blanco, presentó güei el proyectu pilotU que va dexar implantar el sellu ‘S’ de Sostenibilidá Turística -marca pionera creada pol Institutu pa la Calidá Turística Española (ICTE)- nun grupu d’hoteles d’Asturies. Los establecimientos van trabayar colos asesores del ICTE na aplicación y desenvolvimientu de los Oxetivos de Desenvolvimientu Sostenible (ODS) de la ONU dientro de la so xestión empresarial.
El presidente del ICTE, Miguel Mironos, y el coordinador de la Mesa de Turismu de Fade, José Álvarez Almeida, acompañaron a la vicenconseyera na presentación. Al rematar l’actu, roblóse un conveniu ente’l Principáu y l’ICTE, que va asumir los llabores de convocatoria, formación, asesoramientu personalizáu y certificación de la marca ‘S’, de la que ye propietariu. Trátase del primer alcuerdu institucional robláu pol ICTE y una comunidá pa promover la certificación de la ‘S’ dientro del sector, dau l’apueste históricu qu’Asturies caltuvo pola sostenibilidá nel desenvolvimientu del so modelu turísticu.
“Si nos 90 fuimos pioneros nel apueste pola calidá, sumándonos a la Q y al restu de grandes sistemes, pero principalmente pola creación de marques propies qu’evaluaben la calidá nel serviciu y les instalaciones, güei l’apueste diríxese escontra la implantación de bones práctiques que garanticen la sostenibilidá del nuestru entornu natural, el nuestru patrimoniu cultural y la nuestra estructura social”, destacó Graciela Blanco.
L’aplicación de los Oxetivos de Desenvolvimientu Sostenible a la xestión d’empreses turístiques va empezar con una selección d’agospiamientos. Les meyores na planificación de compres pal amenorgamientu de residuos y n’eficiencia enerxética, la formación en materia de sostenibilidá y atención a la discapacidá, los programes de responsabilidá social y les midíes qu’ameyoren la calidá de vida de los emplegaos, son dalgunes de les acciones que se van valorar pa consiguir la ‘S’ de sostenibilidá.
N’evaluando los resultaos d’esti programa pilotu, el sellu va poder estendese al conxuntu d’agospiamientos que cumplan los requisitos esixíos pol ICTE, según a otru tipu d’empreses y equipamientos turísticos.