Asturies vuelve a rexistrar un máximu turísticu n’ochobre y refuerza’l so lideralgu na recuperación del sector

Los agospiamientos turísticos asturianos recibieron n’ochobre a 200.510 visitantes que xeneraron 458.131 pernoctaciones, según los datos publicaos güei pol Institutu Nacional d’Estadística (INE). 

Estes cifres representen el máximu históricu pa esti mes y suponen medríes del 16,8% en viaxeros y del 29,1% n’estancies sobre los datos del 2019. Si la comparanza se fai con ochobre del 2020, les xubíes algamen, respectivamente, el 135,9% y el 147,1%, lo que refuerza’l lideralgu del Principáu na recuperación del sector.

En valores absolutos, ochobre rexistró 28.872 turistes y 103.229 estancies más que les computaes nel mesmu mes de 2019.

Turistas y pernoctaciones en octubre en Asturias
	2019	2020	2021	var 20/21	var 19/21
Turistas	171.638	85.010	200.510	135,9%	16,8%
Pernoctaciones	354.902	185.377	458.131	147,1%	29,1%

Esta crecedera produzse nun contestu xeneral de descensu global, que pal conxuntu d’España supunxo un retrocesu del 13,5% en turistes y del 17,6% n’estancies con respectu al mesmu mes de 2019. Sicasí, la variación foi positiva pa la España Verde, al rexistrar un aumentu del 1,9% en visitantes y del 3,7% en pernoctaciones nel mesmu períodu, con Asturies como líder d’esi aumentu (+16,8% en turistes y +29,1% n’estancies). 

El Principáu ye la comunidá que lidera la xubida de turistes y estancies nel contestu nacional. 
  Toles modalidaes d’agospiamientu rexistraron medríes sobre ochobre de 2019 n’Asturies, con ascensos que superen los 12.000 viaxeros n’hoteles y les 35.000 pernoctaciones en turismu rural. Nel casu de la hotelería, destaca’l comportamientu de los negocios allugaos en conceyos de menos de 100.000 habitantes, qu’algamaron 84.224 visitantes y 169.984 pernoctaciones, lo que representa xubíes del 20,86% y del 15,03%, respectivamente.
 

Turistas en octubre en Asturias
	2019	2020	2021	var 20/21	var 19/21
Hoteles	147.078	63.277	159.299	152%	8,3%
Campings	2.833	3.867	5.857	51%	106,7%
Apartamentos	2.773	2.199	6.511	196%	134,8%
Turismo Rural	18.994	15.667	28.843	84%	51,9%

Pernoctaciones en octubre en Asturias
	2019	2020	2021	var 20/21	var 19/21
Hoteles	300.227	121.467	323.604	166%	7,8%
Campings	7.195	14.478	32.925	127%	357,6%
Apartamentos	5.532	9.815	24.611	151%	344,9%
Turismo Rural	41.948	39.617	76.991	94%	83,5%

Ochobre tamién ufiertó amueses de reactivación del turismu internacional, con un total de 58.616 estancies, 408 más qu’en 2019 y 48.179 percima del mesmu períodu del añu pasáu. Esti aumentu notóse especialmente nel turismu rural, con 6.586 pernoctaciones de visitantes estranxeros (86,2% más que n’ochobre de 2019).

Nel cómputu global de los diez primeros meses del añu rexistráronse 1.599.234 turistes y 4.499.534 pernoctaciones, lo qu’implica aumentos del 29,5% y del 30%, respectivamente, sobro l’últimu exerciciu. Nel cómputu añal destaca’l comportamientu de los campings y apartamentos turísticos, que sumen más pernoctaciones que les rexistraes nel mesmu periodu de 2019.

En términos d’empléu, los establecimientos turísticos asturianos ocuparon a 4.964 persones el pasáu ochobre, lo que representa una medría del 28,8% sobre’l mesmu períodu del pasáu añu.