Asturies va aumentar nun 50 % la prestación del asistente pa persones dependientes

​​​​​​​

• El Principáu ta rematando la regulación nueva que fomenta esta figura, recoyida nel catálogu de prestaciones de sofitu a la dependencia

La normativa nueva sobre la figura del asistente pa persones dependientes que ta ultimando la Conseyería de Derechos Sociales y Bienestar va aumentar nun 50 % la cuantía de la prestación económica vinculada a esti serviciu, qu’ufierta un trabayador d’apoyu tanto pa les xeres cotidianes como nel estudiu o’l trabayu.

La conseyera Melania Álvarez presentó esta selmana al Conseyu de Bienestar Social la propuesta de la futura regulación, que va suponer una meyora importante nel fomentu d’esta figura n’Asturies. El testu nuevu establez la formación qu’han tener los asistentes y incrementa la prestación económica en función del grau de dependencia. Asina, pa un grau I, l’ayuda va movese de 360 a 450 euros; pa un grau II, de 511,34 a 639,18 euros, y pa un grau III, de 858,08 a 1.072,60 euros.

La propuesta plantegada foi ellaborada por un grupu de trabayu, qu’empezó’l so llabor el 29 de setiembre del 2021, formáu por personal técnico de la Conseyería de Derechos Sociales y por representantes de les entidaes ensin ánimu d’arriquecimientu más representatives de les persones con discapacidá: Cerni, Cocemfe, Aspaym, Plena Incusión, No decidas por nosotros, Predif, y Afesa.

La figura del asistente personal ta reconocida dientro del catálogu de prestaciones de la Llei 39/2006, de 14 d’avientu, de Promoción de l’Autonomía Personal y Atención a les Persones en Situación de Dependencia, que tovía tien un camín llargu por percorrer. El so oxetivu ye promover l’autonomía y prevenir la institucionalización de les persones dependientes, d’alcuerdu colo dispuesto na Estratexa pa la Tresformación del Modelu de Cuidaos de Llarga Duración de Persones Adultes nel Principáu d’Asturies.