Asturies, segunda comunidá del país con más tresplantes por millón d’habitantes nel 2021

• ​​​​​​​L’HUCA rexistra per segundu añu consecutivu’l mayor númberu de donantes por muerte encefálica del país
• La tasa rexonal de persones que dexaron los sos órganos ta en 51,5, percima de los 40,2 de media nacional

El Principáu foi nel 2021 la segunda comunidá autónoma con mayor númberu de tresplantes d’órganos por millón d’habitantes (128,7), por detrás de Cantabria (141,4). La media nacional ta en 100,9. Pal cálculu d’esta tasa tiénense en cuenta les intervenciones realizaes a la población asturiana tanto nel Principáu como n’otres comunidaes. Asina, de los 130 inxertos, 121 realizáronse nel Hospital Universitariu Central d’Asturies (HUCA), centru de referencia rexonal pa esti tipu d’intervenciones.
 
La pandemia condicionó esti tipu d’actividá en tol mundu por cuenta de les sobrecargues asistenciales de les unidaes de cuidaos intensivos. Sicasí, nel Principáu caltuvieron tolos programes de donación y tresplantes activos.
 
De les 121 intervenciones realizaes l’añu pasáu polos equipos del HUCA, 15 fueron tresplantes cardiacos, 76 renales y 30 de fégadu (11 más que l’exerciciu anterior). Amás, practicáronse 42 tresplantes autólogos de médula (con célules de la mesma persona) y otros 35 aloxénicos (con célules d’otres persones), 18 de les cualos nun teníen relación de parentescu col receptor.
 
Asina mesmo, nel Principáu inxertáronse 131 córnees.
 
Otra manera, siete persones d’Asturies recibieron un pulmón nel Hospital Universitariu Marqués de Valdecilla, de Cantabria.
 
Donaciones
 
El númberu de donantes aumentó al respective del primer añu de la crisis sanitaria, hasta algamar la tasa rexonal los 51,5 por millón de población (pmp), frente a los 45,5 del 2020. Estos datos asitien a Asturies como la cuarta comunidá en númberu de donantes, precedida por Cantabria (72,4), Navarra (62,1) y Murcia (52,3). La media nacional ye de 40,2.
 
Per segundu añu consecutivu, l’HUCA rexistró’l mayor númberu de donantes en muerte encefálica del país, con 44,6 por millón de población, cuasi’l doble de la media nacional, de 26,2.
 
El Principáu ye la tercer autonomía con mayor porcentaxe de donantes multiórganicos (81%), por detrás de la Comunidá Valenciana (87 %) y Galicia (83 %).
 
Perfil del donante
 
Asturies ye’l territoriu con menos negatives familiares a la donación, concretamente un 5 %, frente al 17 % de media nacional. L’añu pasáu contabilizáronse 91 donaciones, de les que 52 fueron multiorgániques, esto ye, de persones que donaron tolos sos órganos, mentes que 39 dexaron les córnees.
 
La edá media de los donantes ta en 57 años. El 42 % yeren muyeres y el 58 %, homes.
 
La coordinadora autonómica y hospitalaria de tresplantes, Dolores Escudero, sorrayó la importancia de la donación d’órganos, yá que cada donante regala un promediu de 30 años de vida. Amás, dellos estudios demuestren qu’un donante de seis órganos (multiorgánicu) pue ufiertar hasta 55,4 años a los distintos receptores.
 
Por cuenta de la celebración, güei, del Día Nacional del Tresplante, el Gobiernu d’Asturies reconoz el trabayu de los equipos del Serviciu de Salú (Sespa) y estima l’arrogancia y solidaridá de tolos donantes y de les families que faen posible esti tipu d’intervenciones.​​​​​