Asturies, cuarta comunidá del país con más donantes per millón d’habitantes en 2021

La tasa de donantes d’órganos n’Asturies asitiase en 51,5 por millón d’habitantes en 2021, percima de los 40,2 de la media nacional. D’esta miente, el Principáu asítiase como la cuarta comunidá en númberu porcentual de donaciones, tres Cantabria, Navarra y Murcia.

L’añu pasáu, Asturies contabilizó 91 donantes -8 más qu’en 2020-, de los cualos 45 fueron por muerte encefálica y 7 en situación de asistolia (ausencia total de sístole cardiaca). L’Hospital Universitariu Central d’Asturies (HUCA) foi’l centru sanitariu en que se rexistró’l mayor númberu de donantes en muerte encefálica del país per segundu añu consecutivu.

Estos datos fueron facilitaos pola Organización Nacional de Tresplantes (ONT) y amuesen qu’en 2021 la donación recuperóse un 7% y un 8% los tresplantes, tres l’amenorgamientu esperimentáu nel exerciciu anterior de resultes de la pandemia.

Los equipos del HUCA, centru de referencia rexonal para esti tipu d’intervenciones, realizaron l’añu pasáu 76 tresplantes renales y enllantaron 15 corazones, 30 fégados y 131 córnees. El so llabor cuntó cola collaboración de los profesionales de les UCI y l’implicación de los servicios d’urxencies de tolos hospitales asturianos, nel marcu del proyectu de cuidos intensivos empobinaos a la donación. Esti programa fai posible l’ingresu na UCI de persones con dañu cerebral catastróficu y irreversible para facilitar la donación, acordies con los valores, principios y deseos de cada unu.

Per otra parte, Asturies ye, xuntu con Madrid, Cantabria y Cataluña, una de les comunidaes con más pacientes tresplantaos gracies al intercambiu d’órganos ente autonomíes.

Dende l’entamu d’estos programes n’Asturies, llográronse más de 1.450 donantes multiorgánicos y lleváronse a cabu más de 1.860 tresplantes renales, 634 hepáticos y 340 cardiacos.

Alta concienciación de la población

Per otra parte, el Principáu ye la comunidá que rexistró menos negatives familiares en 2021, con un 5%, frente a una media nacional del 17%. Esta cifra reflexa l’alta concienciación de la población asturiana escontra la donación d’órganos, según la solidaridá de les families y de los mesmos pacientes, qu’espresaron los sos deseos nes declaraciones de voluntaes antemanaes. Tamién ye xuna bona amuesa de la calidá del sistema sanitariu, dotáu con personal altamente cualificáu.

La Conseyería de Salú recuerda la importancia de la donación d’órganos, yá que cada donante regala un promediu de 30 años de vida y dellos estudios demuestren qu’un donante multiorgánico (seis órganos) puede ufiertar hasta 55,4 años de vida a distintos receptores.

El Gobiernu d’Asturies reconoz y estima l’arrogancia y solidaridá de tolos donantes y de les families que faen posibles tresplantar.