La Conseyería de Derechos Sociales aumenta hasta 66.000 euros la subvención a la Fundación Bancu d’Alimentos d’Asturies

• El Principáu amplía en 37.980 euros la so aportación respecto al 2020 pa reforzar el repartu de comida y promocionar la seguridá y la sostenibilidá alimentaria
• Melania Álvarez destaca’l llabor “fundamental” que desenvuelve esta entidá coles persones que más lo necesiten

La Conseyería de Derechos Sociales y Bienestar concedió en 2021 una subvención de 65.844 euros a la Fundación Bancu d’Alimentos d’Asturies pa la distribución y xestión de comida, una partida que supón una xuba de 37.980 euros respecto al 2020, cuando l’asignación foi de 27.890. Les 140 entidaes que collaboren con esta organización repartieron alimentos l’añu pasáu a 18.965 persones. 

La conseyera Melania Álvarez y el director xeneral de Servicios Sociales y Mayores, Joaquín Monteagudo, aconceyaron güei con representantes de la fundación. Álvarez destacó el “llabor fundamental” que desenvuelve la organización, “que fai llegar a les personas que más lo necesiten dalgo tan básico y imprescindible como la comida”, al tiempu que valoró les garantíes de seguridá coles que’l Bancu d’Alimentos desenvuelve la so xera.   

La titular de Derechos Sociales tamién espresó’l respaldu firme del so departamentu con esta fundación, que se reflexa nel aumentu de la subvención concedida nel 2021. “Esa xuba respuende a la convicción y el compromisu del Gobiernu d’Asturies con quien trabayen pa da-yos una vida meyor a les persones más vulnerables”, indicó.

L’aportación concedida a la Fundación Bancu d’Alimentos distribúyese de la manera siguiente: 50.000 euros en conceptu de subvención nominativa, 12.532 pa garantizar la seguridá y sostenibilidá alimentaria na xestión y distribución d’alimentos, 686 pa sensibilización y 2.626 pa dinamizar la participación.