El Gobiernu d’Asturies llanza la convocatoria d’ayudes del programa Leader pal añu qu’entra, dotada con 16,5 millones

• El Principáu moviliza agora cuasi 44 millones na zona rural al traviés d’estes subvenciones, cofinanciaes al traviés del Feader​​​​​​​
• Esti exerciciu recibieron fondos 631 proyectos: 429 d’empreses privaes, 42 d’entidaes locales y 60 d’organizaciones ensin ánimu d’arriquecimientu

El Gobiernu d’Asturies publicó esta selmana nel Boletín Oficial del Principáu (Bopa) la convocatoria nueva d’ayudes del programa Leader pal añu qu’entra, dotada con 16,5 millones, y empobinada al empresariáu, les entidaes locales y organizaciones ensin ánimu d’arriquecimientu qu’impulsen proyectos nel mediu rural.

Pa entainar la tramitación d’esta convocatoria, l’Executivu aprobó apocayá un gastu antemanáu que se distribúi de la siguiente manera: 13.000.000 euros pa empreses privaes, 3.000.000 pa entidaes locales y 500.000 p’asociaciones ensin ánimu d’arriquecimientu.

La convocatoria pa 2022 consolida l’aumentu del 40% que yá se produció na anterior na cuantía de la subvención p’autónomos, el tique rural, afitada en 35.000 euros. 

Les ayudes del programa Leader tán cofinanciaes pola Unión Europea al traviés del Fondu Européu de Desenvolvimientu Rural (Feader). El so oxetivu ye contribuyir a fomentar la competitividá de l’agricultura, garantizar la xestión sostenible de los recursos naturales y l’acción pol clima y llograr un desenvolvimientu territorial permediáu de les economíes y comunidaes, con especial atención a la creación de riqueza y empléu nel mediu rural.

Nestos momentos, el Principáu moviliza casi 44 millones al traviés d’estes subvenciones. Asina, na última convocatoria, anguaño n’execución, aprobáronse 631 proyectos, a los que se destinen 22.684.304 euros. Del total d’iniciatives, 429 correspuenden a empreses privaes, 142 son d’entidaes locales y 60 d’asociaciones ensin ánimu d’arriquecimientu.

A esta cantidá súmense los 16,5 millones de la convocatoria que s’acaba de publicar nel Bopa.

A lo último, el Principáu autorizó un gastu de 4.423.475 euros pa sufragar los gastos de funcionamientu de los once grupos d’acción local, que cubren tol territoriu pa la xestión d’estes ayudes. Ente los so llabores inclúyense la espardimientu, animación, sofitu, asesoramientu, impulsu y collaboración con quien entamen nel mediu rural. Tamién s’encarguen d’informar sobre les subvenciones y de tramitales.