El Gobiernu d’Asturies ellabora un decálogu con midíes de protección pa procurar una Selmana Santa segura frente al coronavirus

• Salú recuerda a la ciudadanía que siguen vixentes l’usu de la mázcara n’interiores y n’aglomeraciones, la distancia social y qu’hai que llavar davezu les manes

La Conseyería de Salú ellaboró un decálogu de midíes de protección frente a la covid para procurar una Selmana Santa segura n’Asturies. El documentu recuerda que la mázcara sigue siendo obligatoria n’espacios interiores, mesmo qu’en teatros, auditorios y museos, espacios nos que nun se dexa beber nin comer.

La Dirección Xeneral de Salú Pública anima a la ciudadanía a facer exerciciu físicu n’esteriores y a usar mázcara cuando la práctica deportiva se realice en recintos zarraos, como polideportivos o ximnasios, un encamientu que fai estensible n’esteriores o víes públiques cuando haya aglomeraciones.

Tamién aconseya escoyer establecimientos d’hostelería y restauración que dispongan de bona ventilación, con distancia abonda ente les distintes meses y mididores de CO₂ visibles.

Otra manera, Salú Pública insiste en que s’estremen los cuidaos coles persones mayores y vulnerables al virus. Amás, encamienta a quien nun se vacunaron o completaron la so pauta a protexese de la enfermedá cola profilaxis. Pa ello, pue solicitase l’alministración de la dosis correspondiente nel área sanitaria de referencia, al traviés d’esti enllaz de la web d’Astursalud: https://www.astursalud.es/noticies/-/noticies/formulariu-pa-citar-pcr

El Principáu tamién emplaza a les persones que son positives o sufren síntomes compatibles cola covid a qu’utilicen mázcara FFP2, eviten salir a la cai y les aglomeraciones y el contactu con colectivos vulnerables.

Salú afala a la ciudadanía a siguir actuando con responsabilidá nesta fase nueva de la pandemia, pa que les actitúes individuales y colectives contribuyan a la recuperación social y económica d’Asturies.