Asturies pon en marcha l’acción concertada en discapacidá con 35 entidaes ensin ánimu d’arriquecimientu, dotada con 33 millones

• La Conseyería de Derechos Sociales aumentó nun 50 % la prestación vinculada a la figura del asistente personal y caltién toles subvenciones nominatives a organizaciones

El Gobiernu d’Asturies punxo en marcha l’acción concertada con 35 entidaes ensin ánimu d’arriquecimientu pa l’atención a persones con discapacidá, dotada, primeramente, con 33 millones anguaño, 5 más que nel alcuerdo-marcu vixente. La Conseyería de Derechos Sociales y Bienestar comunicó’l miércoles pasáu los alcuerdos pa la xestión de places a estes organizaciones, responsables de los centros d’apoyu a la integración y de los equipamientos residenciales pa persones con discapacidá.

 L’acción concertada supón un modelu organizativu y regulador nuevu qu’otorga mayor protagonismu na xestión de los servicios a les entidaes ensin ánimu d’arriquecimientu y reconoz la so participación nel desenvolvimientu de la prestación. Asina, enmárcase na Llei del Principáu 3/2019, de 15 de marzu, que la so puesta en marcha viose retrasada pol impactu de la pandemia. L’aplicación d’esta norma va contribuyir a la meyora y axilidá de la xestión tanto pa les entidaes, a les que garantiza un escenariu financieru estable al asegurar l’abonu del costu real de cada plaza, como pa l’Alministración autonómica.

 N’ámbitu de la discapacidá, el Principáu prevé una inversión de 300.000 euros pa la puesta en marcha de les Oficines de Vida Independiente. Paralelamente, incrementó nun 50 % la prestación vinculada a la figura del asistente personal y caltién toles subvenciones nominatives de les entidaes vinculaes a l’atención de la discapacidá, que ronden el millón d’euros. Amás, la conseyería creó’l Premiu de Deporte Inclusivo, dotáu con 6.000 euros.

 Otra manera, l’Executivu autonómicu, consciente de les dificultaes que sufrieron les persones con discapacidá nos años últimos de resultes de la pandemia, incrementó nun 25 % los fondos de la convocatoria d’ayudes a les ONG d’iniciativa social financiada con cargu al 0,7 % del caxellu del IRPF, hasta algamar cuasi los 2 millones.

 En xunto, toes estes midíes sumen más de 37,3 millones destinaos a les persones con discapacidá.​​​​​​​